ڈاکٹر امیر کایا انقرہ سوشل سائنسز یونیورسٹی میں شعبۂ پبلک لاء کے سربراہ اور پروفیسر ہیں۔ ان کی علمی دلچسپیاں مذہب، قانون، اور جدید ریاست کے باہمی تعلق سے متعلق ہیں، بالخصوص ترکیہ کے سیکولر نظامِ حکمرانی اور اسلامی مقتدرہ کی ازسرِ نو تشکیل کے حوالے سے۔ انھوں نے لندن یونیورسٹی کے اسکول آف اورینٹل اینڈ افریکن اسٹڈیز سے قانون میں ڈاکٹریٹ، ہارورڈ یونیورسٹی سے مذہبی مطالعات میں ماسٹر، اور انڈیانا یونیورسٹی بلومنگٹن سے سیاسیات و فلسفے میں بیچلر کی سند حاصل کی۔ ڈاکٹر کایا ترکیہ کی آئینی عدالت میں رپورٹر جج اور وزارتِ قومی تعلیم میں قانونی مشیر کے طور پر بھی خدمات انجام دے چکے ہیں۔ ان کی کتاب "جدید ترکیہ میں سیکولرازم اور ریاستی مذہب: قانون، پالیسی سازی اور دیانت” اس امر کا جامع تجزیہ پیش کرتی ہے کہ دیانت کو ترکیہ کے اسلامو-سیکولر نظامِ حکمرانی کی بنیاد کے طور پر کس طرح تشکیل دیا گیا۔