ڈاکٹر رفیق عبدالسلام تیونس کے ممتاز سیاست دان اور النہضہ پارٹی کی ایگزیکٹو کمیٹی کے رکن ہیں۔ انھوں نے ۲۰۱۱ء سے ۲۰۱۳ء تک وزیرِ اعظم حمادی جبالی کی سربراہی میں قائم تیونس کی پہلی جمہوری طور پر منتخب حکومت میں وزیرِ خارجہ کی حیثیت سے خدمات انجام دیں۔ ڈاکٹر عبدالسلام نے ۱۹۸۰ء کی دہائی میں تیونسی طلبہ کی جنرل یونین کے قیام میں بنیادی کردار ادا کیا۔ وہ لندن میں سنٹر فار اسٹریٹجک اینڈ ڈپلومیٹک اسٹڈیز کے بانی و ڈائریکٹر، مغرب سنٹر برائے تحقیق و ترجمہ کے بانی، اور لندن پلیٹ فارم فار ڈائیلاگ کے سابق چیئر رہ چکے ہیں۔ اس کے علاوہ وہ الجزیرہ سنٹر فار اسٹڈیز کے دفترِ تحقیق و مطالعات کے سربراہ اور سینئر محقق کی حیثیت سے بھی خدمات انجام دے چکے ہیں۔ انھوں نے یونیورسٹی آف ویسٹمنسٹر سے سیاسیات اور بین الاقوامی تعلقات میں ڈاکٹریٹ کی ڈگری حاصل کی ہے اور وہ متعدد کتابوں کے مصنف ہیں۔